ای موُلا علی(ع)

اللاهین یولوندا ازلدن بری
پیامبرین یاری ای موُلا علی(ع)
ایسلامین جانانی اوَّل ایمامی
اوره‌کلرین واری ای موُلا علی(ع)

خیلقتین عالمه وئردی برکت
ایسلامین مرکبی ائتدی حرکت
مؤمونلر قیلدیلار اون یئددی روکعت
تک اللاها ساری ای موُلا علی (ع)

قارانلیق ظولمتی  آرادان یاران
خئیبرین قاپیسین کؤکوندن قیران
نازیل اولوب سنین شأنینده قرآن
پیس گؤزلرین خاری ای موُلا علی (ع)

اللاهین اصلانی مهریبان قولو
پیامبر دامادی هیدایت یولو
بوتون یوخسوللارین سخاوت قوُلو
قرآنین یازاری ای موُلا علی (ع)

تفرقه بیزلری سالیب محنته
مدد قیل بیزلره گلک وحدته
سنین  عشقین‌ایله یئتک جنته
حق باغینین باری ای موُلا علی (ع)

#ایشیق_قاراداغلی

@SheirOcagi