منیم هر درده درمانیم علی (ع) دیر
منیم هر درده درمانیم علی (ع) دیر
منیم عالمده سولطانیم علی دیر
منیم میر جهانبانیم علی دیر
نه دارا تانیرام من نه سکندر
منیم فغفور خاقانیم علیدیر
بهشتی زاهیده وئردیم سراسر
منیم گلزار رضوانیم علی دیر
اگر هر کیمسه نین بیر شاهی اولسا
منیمده شاه شاهانیم علی دیر
توتوب هر مرغ بیر گلشنده مسکن
منیمده باغ و بستانیم علی دیر
منی بو اسم اعظم ائتدی ناطق
منیم مجموع دیوانیم علی دیر
اگر خنجر چکه دوشمن غم ائتمم
منیمده تیغ برّانیم علی دیر
منیم سرمایه ی عمرومدو مولا
منیم جسمیمده بو جانیم علی دیر
منیم یوخ اوندان اؤزگه ذکر فکریم
منیم بو جاندا جانانیم علی دیر
منیم کشتی نوحیم مرتضا دیر
منیم موسی عمرانیم علی دیر
منه ظلمت یولون گؤسترمه ای خضر!
منیم ینبوغ حیوانیم علی دیر
منیم روح الّلهیم اولدی یدالله
منیم شاه سلیمانیم علی دیر
نه دیر باغ جنان و نخل طوبی!
منیم سرو خرامانیم علی دیر
منی سیر گلستانه آپارما
منیم سیر گلستانیم علی دیر
منیم پیر مغانیم شاه مردان
منیم ساقی مستانیم علی دیر
منیم عؤمروم،منیم روح و روانیم
منیم مرغ سخندانیم علی دیر
منیم عرشیم،منیم فرشیم اودور او
منیم مهر فروزانیم علی دیر
منیم لوح و قلم،کرسی سریریم
منیم اورنگ کیوانیم علی دیر
منیم عودوم،منیم رود و سرودوم
منیم هم راح ریحانیم علی دیر
منیم بزم نشاط و عیش و نوشیم
منیم شمع شبستانیم علی دیر
منیم جام می و نقل و کبابیم
منیم سالار ایوانیم علی دیر
منیم مُلکیم،منیم مال و منالیم
منیم هر حکم و فرمانیم علی دیر
منیم تختیم،منیم طاق و رواقیم
منیم بانی و بنیانیم علی دیر
منیم ایزیم،منیم برق جهنده م
منیم رعد خروشانیم علی دیر
منیم لعلیم،منیم دُرّ خوشابیم
منیم باران نیسانیم علی دیر
او شهبازین اسیری مرغ جانیم
منیم شاهین و طرلانیم علی دیر
زمرّددن زبرجددن دم اورمه
منیم دریای عمّانیم علی دیر
دئییر دائم دیلینده خان چوبانی
منیم هرده درمانیم علی دیر