ای طبیعت گونو یاشا!
ای طبیعت گونو یاشا!
محمود صادقپور «شامی»
بو شعر فروردین آیی نین 13-جو گونو، طبیعت گونونه عایددیر. بو موضوعدا شعر یازیلماییب. حؤرمتلی اوستاد شامی اؤلکهمیزده خلق آراسیندا اولان گؤزل قایدالاردان، عنعنوی دویوملار و دئییملردن الهام آلاراق «طبیعت گونو» آدلی بو مثنوینی یازمیشدی. «طبیعت گونو» شاعرین یئنی شعرلریندندیر و ایندیه کیمی چاپ اولماییب، بیرینجی دفعه اولاراق «دنیز»ده نشر ائدیلیر:
بوگون طبیعت گونودور
گزمگه فرصت گونوندور
چؤللر هامی اوزه گولور
بیر باخ داغا- دوزه گولور
«پیشپیشا»لار تومتوم آچیب
هر طرفه عطیر ساچیب
آغاجلار نه اویانیبلار!
الوان گوله بویانیبلار
ائللر چیخیب داغا-باغا
حتی یاغیش یاغایاغا
«اورمیه»نین بو چاغیندا
آخار چایلار قیراغیندا
چمنلرین فرشی اوسته
ائللریمیز دسته دسته
سئوینجایله شنلیک ائدیر
چالیر، اوینور، جالمان گئدیر
نه گؤزلدیر داغ- درهلر
سیخ مئشهلر، منظرهلر
گؤزل قیزلار، اودور گلیر
چیچک دریر، گول دستهلیر
تا اؤزونه تاپسین اری
دوگونلهییر بیتگیلری!
بعضیلری توپ اویناییر
باغدا «گیزلن پوپ» اویناییر
بعضیلری «کیفلان» گئدیر
گؤرنلری حیران ائدیر
ساچلارینی وئریر یئله
باخان دویمور اینجه بئله
اوشاقلار دا چمن اوسته
اویناییرلار «پیلله دسته»
«رسام» گلیر فیرچا الده
دولانیر یامیاشیل چؤلده
شکیل چکیر داغ-درهدن
هر بیر گؤزل منظرهدن
ای طبیعت وورغونلاری
گلین بیزیم یوردا ساری
باخین سولار اؤلکهسینه
قولاق آسین قوش سسینه
نئجه گؤزل اوخویورلار
یووالارین توخویورلار!
محشر ائدیر بهار بوردا
نه یاپیشیر ناهار بوردا!
داغدان گلیر گور شلاله
شعله چکیب یانیر لاله
سولار آخیر شاققیلداییر
سماورلر پاققیلداییر
قیز-گلینلر بیتیردیگی
ائولریندن گتیردیگی
«گؤی»لرینی سویا آتیر
حکمتی وار اونا خاطیر:
«کؤوشن» اولار جنت تکین
آدام بویدا چیخار اکین
یاواش- یاواش قاش قارالیر
آخشام گلیر گون دارالیر
سس-سمیرلر هامی باتیر
گئتمگین ده وقتی چاتیر
آیریلیق اولور چوخ چتین
قوینوندان بو طبیعتین
یئردن دورور آنا قادین
سسلر ارین هم اؤولادین
زورلا ییغیر اؤز باشینا
تپیلیرلر بیر ماشینا
دوشوب یولون اثرینه
قاییدیرلار ائولرینه
*********
ایندی قیزلار اولوب یامان
گلیب ائوه چاتان زمان
تک نیتی بودور دیلده:
اره گئتسین یئنی ایلده
یادا سالیر ایگیت یارین
چیخاریر اؤز باشماقلارین
باخ ایشینه دقت ائله
آستانادا قویور بئله:
ائوه طرف دابانلاری
بورنو دؤنور چؤله ساری
دئییبلر کیم بئله ائدر
ائودن چیخیب گلین گئدر...
یاشاسین بو دبلری میز
اونوتماریق اونلاری بیز
بئلهلیکله ایل بایرامی
ائل بایرامی، گول بایرامی
«اورمیه» ده چاتیر باشا
ای طبیعت گونو یاشا!
اما منه معمادی
نییه شومدور «اون اوچ» آدی؟!
خورباخاندا عوام سنه
یامان آجیق گلیر منه
اینجیسه ده اگر هامی
سئودهجکدیر سنی «شامی»
سندن الهام آلاجاقدیر
جوشوب قلم چالاجاقدیر
او اینانماز خرافاتا
جهالتدن دوغار خطا.
93/01/13
منبع: «دنیز »هفته نامه سی - شماره 52، نشر تاریخی 93/02/14