یامان  ترسه  دونور  زمانه  ایندی.

قینیندان  چیخانلار چاغی بئینمیر.

هرکس اؤزون آغا سانیر خان سانیر.

خیرداجا  تپه لر  داغی  بئینمیر .

ایکی گوندی چاتیب ثروته وارا.

ادبی  حورمتی  قویوب  کنارا .

خلقی یئرده گورور اؤزون سوارا

آتین چاپیر سولی ساغی بئینمیر.

اونودوب طایفاسی واردی ائلی وار.

آنا  دیلین  آتیب  باشقا  دیلی وار.

ائوینده سارالمیش ایکی گولو وار.

الوان آچان گوللو باغی بئینمیر .

کاتب اوغلو  قاره  گولور  آغلارا .

تیکان دوروب طعنه وورور باغلارا.

نباتی  یاغ  قاریشیبدی  یاغلارا .

اؤزون توتور اصیل یاغی بئینمیر.

@bayatilar

 

انسان اوغلو دونیا  عیبرت ائویدی.

گوزو  آچیق  عیبرت آلان  اولسادا .

دونیایه آلدانیب اویونجاق  اولماز .

حق سوزو ائشیدیب قانان اولسادا.

دونیا بیر میداندی چالیش آد قازان .

خلقه خدمت ائیله تا کی وار زامان .

اجل بیر کیمسه یه هچ وئرمز امان .

هر یئرده گیزله نیب پنهان اولسادا .

آللاه  یارادیبدی  قولا  قول اولما .

هوس آتشینده یانیب کول اولما .

اینجیتمه کیمسه نی آجی دیل اولما.

باغلانار دیللر خوش بیان اولسادا.

کاتب اوغلو ائشید حققین نغمه سین.

بیر اینسان کی ائلین قدرین بیلمه سین.

عالیم کی علمینه زکات  وئرمه سین.

لعنته  لایقدی  لقمان   اولسادا .

@bayatilar