بازنشسته ای از ملکان

شعر طنز از علی بابا جوانمرد

دلارین قیمتی آرتیبدی، بادمجان سنه نه؟!

نه خبر هی دئییسن ائللره قان‌قان سنه نه؟!

ییرمی درصد قویولوب آفتافانین قیمتینه

آفتافا باغلی‌دی لاپ خارجه، نوودان سنه نه؟!

لپه چیلتیک چالیری، ماش‌لا نخود اویناییری

اونلارین تویلاری‌دی سبزی فروش‌جان، سنه نه؟!

باشیمی اون مینه قیخدی دئدیم اوستا: نه اولوب؟!

دئدی ارزین چوخالیر قیمتی هر آن سنه نه؟!

ته‌یه‌ریم یئلسیزی‌دی ، یئلله دی اوچ مین‌تومنه!

دلارین نرخی ائدیر یئللری طوفان سنه نه؟!

دئدیم:آخ بیر چوره‌گین وزنی اولار اللی گرم؟

تئز جاواب وئردی شاطر:گئت مشه قوربان، سنه نه؟!

تویوغون قیمتی قاچماق‌دا بوگون اوّل اولوب

هله سؤز یوخ آغ اته، قاره بادیمجان سنه نه؟!

دالی یانمیش یئتیشیب اوت‌یاغی دوز ییرمی‌مینه

ایندی یاغ ساغلیغینا اوینوری میدان سنه نه؟!

نه خبر، بسدی «جوانمرد»یئمه باش‌بئنی‌میزی

ایندی ارزیله گزیر گردش دوران سنه نه؟!