داستان اصلی و کرم : از صفحه 41 تا 45
درباره لیلی و مجنون آذربایجان
داستان اصلی و کرم : از صفحه 41 تا 45
داستان اصلی و کرم : از صفحه 41 تا 45
صفحه : ۴۱
کرم سؤزونو تاماما یئتیردی. باخدیلار کی، بو دوغرودان حاق آشیغیدی. کئشیشگیلین گئتدیگی یولو اونلارا گؤستردیلر. کرمگیل گئجه نی اورادا قالیب، سحر تئزدن یولا دوشدولر. بیر آز گئتمیشدیلر، سرین بیر مئه باشلادی. مئه قاباق طرفدن اسیردی. لاپ اونلارین اوزونه ووروردو. کرم دئدی: - صوفی، دایان، من خان اصلیمی بو بادی-صبادن خبر آلاساغام. سازی کؤینگیندن چیخاریب، باسدی باغرینا، دئدی: ایلنمیر کی، یاردان خبر سوراییم، اسیب-اسیب گئدن بادی-صبا هئی!.. قیریلسین بایسین قولو، قانادی، هئچ کیمسه دوشمه سین یاردان سیدا هئی!.. یودوم دولبندیمی، بیاض ائیله دیم، سیلدیم کؤنول پاسین، آیاز ائیله دیم، من قانلی فله یه نییاز ائیله دیم، فلک منه وئردی چوخلو صفا هئی!.. دورمایوبان آخیر چئشمیمین یاشی، اخدیغی یئرلرده اریدیر داشی، بئله ایمیش قانلی فلگین ایشی، نه شاه بیلیر، نه خان، نه ده گدا هئی!.. من کرمم، خوریاتلارا تای اولدوم، بیوفا یار سئودیم، عجببای اولدوم، عؤمور اوزدوم، گون چوروتدوم، زای اولدوم، منی بوشالتدیلار قابدان قابا هئی!.. بیر آز اوتوردولار. دینجلرینی آلیب، یورغونلوقلارینی چیخارتدیقدان سونرا دوروب گئتمگین بیناسینا قویدولار. آز گئتدیلر، چوخ گئتدیلر، بیر شهر خارابالیغینا چیخدیلار. کرم دایانیب دئدی:
صفحه : ۴۲
- صوفی له له، بیر زامان واریمیش کی، بو شهرده آداملار دؤوران سورورموش. دایان، سوروشوم، گؤروم بو شهر نییه خارابا قالیب؟ آداملاری نئجه اولوب؟ الدی کرم گؤرک خارابا شهره نه دئدی:
سیاح اولوب بو عالمی گزرکن راست گلمیشم بو ویرانین داشینا. سؤیله ویران، نه زاماننان بریسن؟ نه گلمیشدی، نه گلسک باشینا؟
کرمین سؤزلریندن ویران دیله گلیب دئدی: حضرت نوهون زامانیننان برییم، امر-هاقلا نه لر گلدی باشیما... باشیما گله نی سؤیلگیم سنه گؤر نه زهر قاتیلیبدی آشیما. الدی کرم: کیم ائشیتسه سنین آه ایله زارین، ترک ائلیر الده اولانین، وارین، نؤچون خاراب اولدو چارسی-بازارین، عاغیل ایرمز او خودانین ایشینه. الدی ویران: اوچ یوز آلتمیش چئشمه لریم آخاردی، گؤزللریم سئیرگاها چیخاردی، خانیملاریم ل`لو گؤوهر تاخاردی، باخمازمیسان خان یئرینده داشیما. الدی کرم:
صفحه : ۴۳
دردلی کرم سنه ویران سؤیله دی، سؤیله، یگیدلرین فلک نئیله دی؟ کیملر گلیب سنی ویران ائیله دی؟ فلک نییه داشین سالدی باشینا؟
الدی ویران:
چوخلو یگیدلریم واردی بورادا، کیمی ساز چالاردی، گزیب اورادا، ایندی ویران اولوب، قالدیم آرادا، ویرانام، اونلاری چکدیم دؤشومه.
کرم سؤزونو-تامام ائله ییب، گئتمگین بیناسین قویدو. گئدیب، گئدیب، اخشام چاغی چالوبا دئییلن بیر یئره چیخدیلار. کرم هر جور آغاجدان، گولنن دولو، لاله زار بیر باغا گیردی. باغین ایچینده بیر دسته قیز چالیب، اوخویوب، اویناییردی. کرم بو قیزلارین ایچینده -اصلییه بنزر بیر قیز گؤردو، دئدی: - صوفی، دایان بیر قاتار سؤز دئییم، بو قیز منیم خان اصلیمه بنزه ییر. کرم اورگی دمیرچی کوره سی کیمی آلیشیب یانا-یانا بو قیزا دئدی:
گؤزللر چیخیبلار سئیره، بیریسی اصلیمه بنزر. ال گئییبن ساللانیشی، یئریشی اصلیمه بنزر.
کرم بئله دئینده هامان قیز قولاج ساچلارینی سینه سازی ائله ییب، گؤرک کرمین بو سؤزونون موقابیلینده نه دئدی:
اوزاق ائلدن گلن، آشیق، سنین اصلین من دئییلم، چوخون درده سالان، آشیق، سنین اصلین من دئییلم. الدی کرم:
صفحه : ۴۴
عشقین باده سینی ایچدیم، بولانیق چایلاردان کئچدیم، بیر قیز گؤردوم، درده دوشدوم. دوروشو اصلیمه بنزر.
الدی قیز:
سؤزونو قانمیشام ازل، باغیما دیمه ییب خزل، هاییستانا گئتدی گؤزل، سنین اصلین من دئییلم.
الدی کرم: منه موشتاق قوربت ائللر،
گؤز یاشیمی کیملر سیلر؟
کرم آغلار، رقیب گولر،
گولوشو اصلیمه بنزر.
الدی قیز:
سنین آختاردیغین اصلی،
قارا قاشلی، قارا گؤزلو،
منیم آدیم خانیمنازدی،
سنین اصلین من دئییلم.
سؤز تامام اولدو، کرم کئشیشی اوندان خبر آلدی قیز دئدی:
- سنین آختاردیغین کئشیش بو گون کؤچ-کولفتینن بورادان کؤچوب، گونچیخان طرفه گئتدی.
کرم بو سؤزو قیزدان ائشیدن کیمی سازی سینه سینه باسیب، گؤرک صوفییه نه دئدی:
صفحه : ۴۵
دورما، گئدک، صوفی له له، یئنه اصلیم کؤچ ائیله ییب. قان آغلارام بوننان بئله یئنه اصلیم کؤچ ائیله ییب. اصلیم ائلیندن کؤچوبدو، المالی داغدان کئچیبدی، داشبولاخدان سو ایچیبدی، یئنه اصلیم کؤچ ائیله ییب. یاردان منه یارا دیمیش، هئچ دوزلمز بو موشکول ایش، اونلا بئله قارا کئشیش، یئنه اصلیم کؤچ ائیله ییب. صوفی، گل ائیله سؤیله مه، باغریمین باشین تئیله مه، گئدیرم، یولدان ائیله مه، یئنه اصلیم کؤچ ائیله ییب. قارشیمیزدا قارلی داغلار، کؤنول محبتی چاغلار، اصلی کؤچوب، کرم آغلار، یئنه اصلیم کؤچ ائیله ییب.
کرمگیل اورادان دا قالخیب، بیر نئجه گون یول گلدیکدن سونرا گلیب بیر کنده چیخدیلار. باخدیلار کی، بورادا توی وار. کرمین رنگی گول یارپاغی کیمی سولدو. صوفی خبر آلدی: - کرم، سنه نه اولدو؟ کرم دئدی: - زالیم کئشیش اصلینی اره وئریب، بو توی دا اونون تویودو. صوفی دئدی: - گل دالیمجان، آللاه کریمدی.