داستان اصلی و کرم : از صفحه 21تا 25
درباره لیلی و مجنون آذربایجان
داستان اصلی و کرم : از صفحه 21تا 25
داستان اصلی و کرم : از صفحه 21تا 25
صفحه : ۲۱
سئیراغیباسیررینیزیوئرمگین،
کئشیش گلسه بو یئرلره قویمایین،
اصلی گلسه کرم گئتدی، سؤیلگین،
گلین حالاللاشاق، من گئدر اولدوم.
سؤز تامام اولدو، کرم اؤز دوستلاری ایله گؤروشوب آیریلدی. صوفی ایله بیرلیکده یولا دوشدو. نه گئجه بیلدیلر، نه گوندوز بیلدیلر، آز گئتدیلر، چوخ گئتدیلر، بولاق باشیندا بیر دسته قیزا راست گلدیلر. بونلارین ایچینده اصلی خانا بنزر بیر قیز وار ایدی. کرم گؤرن کیمی سازی سییرینه باسیب دئدی:
ساللانا-ساللانا یولون اوستونه
چیخان دیلبر، منی ساننان ائیله دین،
قوبا قاز یئریشلی، شاهین باخیشلی،
باخان دیلبر، منی ساننان ائیله دین.
شاهین کیمی گؤر نه گلیر اوستومه،
خوب یاراشیر قیزیل گوللر دستینه،
باخیشلاری دوروب سانیم قصدینه،
باخان دیلبر، منی ساننان ائیله دین.
ترلان گؤرسه هورکوشسک سونالار،
قورخوم بودو - غئیری گؤله قونالار؛
اغ اللره، الوان-الوان حنالار
یاخان دیلبر، منی ساننان ائیله دین.
کرمین دردینه آغلایار گؤیلر،
گلیب گئدنلره دردینی سؤیلر،
کؤنول اصلی خاندان غئیریسین نئیلر؟!
دوران دیلبر، منی ساننان ائیله دین.
کرمین بئله اوخوماغینی گؤرن قیزلار یولدان چیخیب کنارلا گئتمک ایسته ینده کرم سازینی آلیب، گؤرک بو دفعه قیزلارا نه دئدی:
صفحه : ۲۲
مندن کوسن نازلی، نازلی باجیلار،
من کناردان کئچیم، یول سیزین اولسون!
اورگیمده چوخدو قملر، آسیلار،
اغولار منیمکی، بال سیزین اولسون!
من یولچویام، یوللار کئچیب گئدیرم،
عشقین قاتارینی چکیب گئدیرم،
یانیقلییام، سو وار، ایچیب گئدیرم،
بیر جام وئرین ایچیم، دول سیزین اولسون!
سینم دویونلودوجییریم قارا،
اصلیسیز قالمیشام قمگین، آوارا،
باش گؤتوروب گئتدیم چؤله، دییارا،
ویرانه لر منیم، ائل سیزین اولسون!
مئی ایچیب مست اولماق یاراشماز بیزه،
یاری گرک تاپام من گزه-گزه،
بیر قونچا گولوم وار، تزه، تر-تزه،
یئنگیده آچیلان گول سیزین اولسون!
دردلی کرم دئیر: گؤزه لیم اصلی،
گؤزلریم یاشلیدی، اورگیم پاسلی؛
اوندان آیریلالی یاسلییام، یاسلی،
من قارا گئیینیم، آل سیزین اولسون!
سؤز تامام اولدو، قیزلار کرمه سو وئردیلر. کرم سو ایچدیکدن سونرا صوفی ایله بیرلیکده یولا روان اولدو. بیر مودت یول گلدیکدن سونرا کیچیک بیر کاروانا راست گلدیلر. کرم کاروانی گؤرنده اصلی یادینا دوشدو، آلدی سازی، سینه سینه باسدی، دئدی:
صفحه : ۲۳
ای آغالار، کؤنول قوشو
هاوایا قالخیر، اَیله نیر.
قوربت ائله دوشن آدام
گؤز یاشین سیلیر، اَیله نیر.
بومو قوربت ائلین حالی،
موشکول اولور یار ووصالی،
سئودیگیم یارین خییالی
عاغلیما گلیر، اَیله نیر.
ملشیر قویون، قوزولار،
هره اؤز ائلین آرزولار؛
اوزاق اولاندا منزیللر
بیر زامان قالیر، اَیله نیر.
سؤزوم آغیزلاردا، دیلده،
گؤزوم قالیب قونچا گولده؛
دردلی کرم قوربت ائلده
اهو زار ائدیر اَیله نیر.
- سؤز تامام اولدو. هامی کرمین قملی-قملی اوخوماسینا تعججوب ائله دی. کاروانباشی سوروشدو: - آشیق، سنه نه اولوب کی، بئله یانیقلی-یانیقلی اوخویورسان؟ اورگیمیزی لاپ قانا دؤندردین. صوفی ماجرانی بونلارا ناغیل ائله دی. کاروانباشی دئدی: - آشیق، بیز کئشیش گؤرمه میشیک. آنجاق بو یاخیندا بیر اوبا وار، گئدین اورایا، سوروشون. بلکه اونلار بیلرلر. کرمگیل اونلارلا خوداهافیزلشیب، یولا روان اولدولار. بیر قدر گلیب، اؤزلرینی هامان اوبایا یئتیردیلر. اونلارین باشینا چوخ آدام توپلاندی. کرم سازی آلیب، اصلی خانی گؤرک بو آداملاردان نئجه خبر آلدی:
نازلی یاریمی قاچیرتدیم، ائللر، خان اصلیم گؤردوزمو؟ بولبولو باغدان اوچورتدوم، گوللر، خان اصلیم گؤردوزمو؟
صفحه : ۲۴
بو گون بیزیم ائللر کؤچر، ایاغی بو یولدان کئچر، چوخ گؤزل بو سودان ایچر، گؤللر، خان اصلیم گؤردوزمو؟
اصلی حورئیدی بیلَنه، قوینو جننتدی گیرنه؛ گؤزلری بنزر جئیرانا، چؤللر، خان اصلیم گؤردوزمو؟
اوبالاری اویماق-اویماق، اولماز ایمیش یاردان دویماق، اغیز سوددو، دوداق قایماق، دیللر، خان اصلیم گؤردوزمو؟
زولفودوهازار، سد هازار،
نه گؤزل داراییب دوزر، قوربت ائله دوشموش، گزر، یوللار، خان اصلیم گؤردوزمو؟
گلدیم، گؤردوم اصلی کؤچوب، اتین سوروب بوردان کئچیب، اییلیب سویوندان ایچیب، سولار، خان اصلیم گؤردوزمو؟
کرم دئیر؛ سانیم کیمی، اتلاس گئیر خانیم کیمی، من سئویرم سانیم کیمی، ائللر، خان اصلیم گؤردوزمو؟
گورجوستانا گئتمگی
صوفی گؤردو کی، کرمین اوخوماغیندان بونلار بیر شئی باشا دوشمه دیلر، دیلله خبر آلدی:
صفحه : ۲۵
- قارداش، بو طرفلرده کؤچ-کولفتنن بئله واریب گئدن بیر کئشیش گؤرمه دینیزمی؟ بونلاردان بیر نئچه سی کئشیشین گورجوستانا طرف گئتدیگینی سؤیله دیلر. کرمگیل ائله هامان گونو گورجوستانا طرف گئتمگین بیناسین قویدولار. بیر مودت یول گئتدیلر، بیر چؤلون دوزونده گؤینن گئدن بیر قاتار دورنا گؤردولر. کرم دورنالاری گؤرن کیمی سازینی سینه یه باسیب، گؤرک دورنالاردان نه خبر آلدی:
قاتار-قاتار گؤی اوزونده سوزورسوز، ایلن، دورنام، اَیلن، خبر سوراییم. بیزیم یورددان نه خبرلر بیلیرسیز؟ ایلن، دورنام، اَیلن، خبر سوراییم.
بیزیم یئرده سرین بولاق آخارمی؟ یاز گلنده بنؤوشه لر قوخارمی؟ الا گؤزلوم جئیرانگاها چیخارمی؟ ایلن، دورنام، اَیلن، خبر سوراییم.
بیتمزمی آغاجی بیزیم باغلارین، اسکیک دئییل هر جور گولو داغلارین، هئچ اولورمو سنین گؤزل چاغلارین، ایلن، دورنام، اَیلن، خبر سوراییم. خان اصلیمین جئیرانگاهی هارادا؟ حاق چاتدیرسین آشیقلاری مورادا؛ سانیم دورنا، نه گزیرسن بورادا؟ ایلن، دورنام، اَیلن خبر سوراییم. دردلی کرم دئیر: هاردان گه لرسیز؟ خان اصلیمین یئرین، یوردون بیلرسیز، گؤرسز، اونا مندن سالام دئیرسیز، ایلن، دورنام، اَیلن، خبر سوراییم.