داستان اصلی و کرم : از صفحه 6 تا 10
درباره لیلی و مجنون آذربایجان
داستان اصلی و کرم : از صفحه 6 تا 10
داستان اصلی و کرم : از صفحه 6 تا 10
صفحه : ۶
منیمله دوروبسان قاباق-قاباغا،
اولوم قامتینه قوربان، ساداغا،
ضیاد خان اوغلونا اولماز قاداغا،
کرم اوغلان، کرم ائیله، قوشون آل!
بولبوللر اوخویور باهارین فصلی،
گؤزلرین اولوبدو جانیمین قصدی،
ادیم مریم ایدی، سن قویدون اصلی،
کرم اوغلان، کرم ائیله، قوشون آل!
سؤز تاماما یئتدی. کرم قیزا، قیز دا کرمه آشیق اولدو، عهد-پئیمان ائله دیلر.
کرم بارماغینداکی اوزویو قیزا، قیز دا ایپک دسمالینی کرمه وئردی.
کرم اصلینین گؤزلریندن اؤپمک ایسته ینده اصلی گئری چکیلدی. ساچلاریندان ایکی تئل اییریب، سینه ساز ائله دی، آلدی، گؤرک نه دئدی:
نه گزیرسن ملول-ملول بو یئرده؟
امان کرم، منی روسوای ائیله مه!
سنی منه قیسمت ائیله ییب خودا،
امان کرم، منی روسوای ائیله مه!
کرم قیزین یالوارماغینا باخماییب، اونو قوجاقلادی. اصلی بیر تهر اونون الیندن قورتاریب دئدی:
هئچ اولورمو بو یئرلرده بئله ایش؟
کئشیش بابام دویوب ائیله یر تفتیش،
اؤپدون ده، قوجدون دا، آرتیق وار، سوووش،
امان کرم، منی روسوای ائیله مه!
کرم اؤزونو ساخلایا بیلمه ییب، ال آتدی قیزین اینجه بئلینه.
اصلی دئدی:
صفحه : ۷
دویمامیشام شکر کیمی دیلیندن، قورخوم یوخدو منیم هئچ ده اؤلومدن، ساریلیبسان اینجهمییان بئلیمدن، امان کرم، منی روسوای ائیله مه! اغام کرم، پاشام کرم، خان کرم! الیش کرم، توتوش کرم، یان کرم! اصلین اولسون سنه قوربان، سان کرم، امان کرم، منی روسوای ائیله مه!
سؤز تامام اولدو. کرم اونونلا حالال-هورممت ائله دی، صوفی نین یانینا قاییتدی، آتینی مینیب شهره گلدی. اؤز منزیلینده اصلی دئییب گیزلی-گیزلی آغلاماقدا اولسون، سیزه دئییم ضیاد خاندان. ضیاد خانا خبر چاتدی کی، اوغلون خستله نیب، نئچه گوندو کی، منزیلیندن باییرا چیخمیر. هامان ساعات ضیاد خان قالخیب، اوغلونون یانینا گلدی، خبر آلدی: - اوغلوم، دردین ندی؟
کرم دئدی: - آتا، ایذن وئر، دردیمی ساز ایله دئییم، دیلنن دئسم دیلیم آلیشیب یانار. ضیاد خان ایذن وئردی.
الدی کرم، گؤرک آتاسینا نه دئدی:
کئشیش باغچاسیندا بیر گؤزل گؤردوم، عاغلیمی باشیمنان آلدی، نه چاره؟ داراییب زولفونو، تؤکوب اوزونه، سریمی سؤودایا سالدی، نه چاره؟
من ده بیلدیم بو بیر ترسا قیزیدی، سحردن پارلامیش دان اولدوزودو، یاشیل باش سونادی، گؤللر قازیدی، عاغلیمی باشیمدان آلدی، نه چاره؟
صفحه : ۸
دردلی کرم دئیر فورقتیم قاتی، کسکیندی قیلینجی، یویرکدی آتی، او، عیسوی، من محممد هوممتی، اتشی سریمده قالدی، نه چاره؟
سؤز تامام اولدو، ضیاد خان دئدی: - اوغول، سنین دئدیکلریندن من بیر شئی باشا دوشمه دیم. ایر آشیقسان، دئ گؤروم کیمی ایسته ییرسن، سنین اوچون آلیم.
کرم اوچ یاشیندا اوشاق کیمی باشلادی آغلاماغا. ضیاد خان اوغلونون یانیندان چیخیب، بیر باش دیواناگلدی، تاختینا چیخیب امر وئردی کی، هر کیم منیم اوغلومون دردینی بیله، من اونو دونیا مالیندان قنی ائلرم. شهرده طبیب قالمادی گلمه میش اولا، آما هئچ کیم کرمین دردیندن بیر شئی آنلایا بیلمه دی. بیر گون کرم اوتورموشدو باغدا، اؤزو ده چوخ داماقسیزدی. بیر قاری ائشیتدی کی، ضیاد خانین اوغلو خسته دی، هئچ کیم ده اونون دردینی تاپا بیلمیر، دئدی: - هر نه اولور-اولسون گرک من کرمین دردینی تاپام، بلکه ضیاد خان منه بیر قیرمیزی دونلوق وئره.
قاری عصاسین الینه آلیب، اؤزون یئتیردی ضیاد خانین باغینا، گؤردو کرم چوخ قمگین اوتوروب، گؤزلری یول چکیر، دئدی: - اوغول، شهرین گلینلری، قیزلاری، اوغلانلاری گولشن باغینا سئیره چیخیبلار، سن نه اوچون بورادا تک-تنها اوتوروبسان؟ کرم دئدی: - قاری ننه، سننن بیر سؤز سوروشاجاغام. آنجاق بو سؤز ایکیمیزین آراسیندا قالمالیدی.
قاری دئدی: - اوغول، قاری کی وار، بیر اوووج داریدی. هارا سپله سن، ائله اوراداسا قالار. سن سؤزونو دئ! کرم دئدی: - ننه، او قیزلارین ایچینده کئشیشین قیزی دا اولاجاقمی! قاری دئدی: - اولاجاق. کرم دریندن بیر آه چکدی. قاری ایشی باشا دوشدو، بیلدی کی، کرم مریمه اشیقدی. بالاغینی قاتلاییب، اؤزونو ضیاد خانا یئتیردی، دئدی: - ضیاد خان، اوغلووون دردینی بیلمیشم. ضیاد خان سوروشدو:
صفحه : ۹
- اوغلومون دردی ندی؟ قاری دئدی: - اوغلون کئشیش قیزی مریما آشیق اولوب. ضیاد خان ایشی یقین ائله یندن سونرا قارییا پول وئریب یولا سالدی، هامان ساعات کئشیش اوچون آدام گؤندریب، حوضورونا چاغیرتدیردی. کئشیش ضیاد خانین هوزورونا گلیب، ادب-سالامینی یئرینه یئتیردی. ضیاد خان اونا اوتورماغا یئر گؤستردی. کئشیش اوتوردو، ضیاد خان دئدی: - کئشیش، منیم اوغلوم سنین قیزینا آشیقدی، بو گون-صاباح گرک تویلارینی ائلیک. کئشیش دئدی: - منیم گؤزوم اوسته! آنجاق منه اوچ آی مؤهلت وئر، تداروک گؤروم. ضیاد خان راضی اولور، اوسته لیک اونا بیر اوزوک وئردی کی، قیزا وئرسین. کئشیش اوزویو الاندان سونرا بیر باش ائوینه گلدی، آروادینی چاغیریب دئدی: - آرواد، ضیاد خان قیزی الیمیزدن آلاجاق. گل قاچاق! ارواد راضی اولدو، هامان گون ائوده اولان هر نه شئیلری واردیسا ساتدیلار، سحر اچیلمامیش کؤچ-کولفتنن شهردن چیخیب قاچدیلار. اونلار قاچماقدا اولسون، سنه کیمنن دئییم، صوفیدن. صوفی ایشدن خبردار اولان کیمی کرمین یانینا گلیب دئدی: - آتان کئشیشین قیزینی سنه آلدی، نیشان دا تاخدیلار. کرم بونو ائشیدن کیمی سازینی سینه سینه آلیب دئدی: وعده سی چاتینجا، سوسن، سونبولون، صفاسین چکمه یه دال گلسین، گئتسین! سورگین دونیانین ذؤوق-صفاسین، بوینا دولانماغا قول گلسین، گئتسین!
سوسن ندی، سونبول ندی، گول ندی، اغ اوزونده قوشا-قوشا خال ندی، شکر ندی، شربت ندی، بال ندی، وئر، آغزیم ایچینده دیل گلسین، گئتسین!
صفحه : ۱۰
دوست باغیندا سوسن، سونبول منیمدی، بوداغیندا اؤتن بولبول منیمدی، باغچادا خار گؤرمه ین گول منیمدی، اؤپمک چون دوداغا خال گلسین، گئتسین! شاه گلیب فتح ائتدی بو کرم کانی. کرمین آشیغی، معشوقو هانی؟ قورخورام قاچیردا اصلی سونانی، قویما اوسته غئیر ال گلسین، گئتسین!
سؤز تامام اولدو. کرم یاری شاد، یاری ناشاد منزیلینه کئچیب، دوز اوچ آی گؤزله دی. بیر گون بوتاسی یادینا دوشوب، سازینی الینه آلیب، آتاسی نین یانینا گلدی. ضیاد خان خبر آلدی:
- اوغول، بئله گلمگی نین سببی ندیر؟ کرم سازینی آلیب، گؤرک آتاسینا نه دئدی:
اشدی گئتدی قارلی داغین آردینا، خان اصلیم یادیما دوشدو، آغلارام. هئچ طبیبلر چاره ائتمز دردیمه، خان اصلیم یادیما دوشدو، آغلارام. داغلارین بورچوسو منه یورد اولدو، مئشه سینده آسلان اولدو، قورد اولدو، بو اوچ آی منه بیر بؤیوک درد اولدو، خان اصلیم یادیما دوشدو، آغلارام. اوجا داغ باشیندا اؤتوشور قوشلار، مارالیم قاچیبدی، کیملر گؤرموشلر؟ دردیمی آنلاماز قارا کئشیشلر خان اصلیم یادیما دوشدو، آغلارام. هئی آغالار، بودو سؤزون ازه لی،