حیات فلسفه سی
شعراوجاغی
حیات فلسفه سی
قوشلار قطار - قاطار ائللردن کئچر
بشر نسیل- نسیل دونیادان کؤچر
اینسانلیق گاه زهر، گاه شربت ایچر
ازلدن بئله دیر حؤکمو زامانین
دویوملو بیر سیرری وار آسمانین
چرخینی قوردوقچا دؤورانین الی
بعضن آغلار اولور، بعضن گولمه لی
اینسانین ان بؤیوک عشقی، عملی
بعضن آصلان کیمی چیرپینیر داردا
بعضن ده غرق اولور فیرتینالاردا
دییشیر سمتینی دایما سولار
دییشیر فیکیرلر، دؤنور دویغولار
کاینات توتماییر بیر یئرده قرار
چارپیر سینه سینی قایالیقلارا
او گاه قیشا چیخیر، گاه دا باهارا
دونیا بیناسینی قوراندان بری
سعادت آدلانان او گؤزل پری
گل! دئیه سسله میش قرینه لری
یازیقلار اولسون کی، هله اینسانلیق
گلیب قوووشمامیش اونا بیر آنلیق
ای دونیا گؤزه لی، قاچما بشردن
اینساندیر آییران خئییری شردن
گل اونون عشقینی اوجوز توتما سن
قلبی وار، حیسسی وار هر محبتین
قارالماز اولدوزو ابدییتین
اؤلوم بیر ایبلیسدیر، حیات بیر ملک
وارلیغی ایزله ییر هئچلیک کؤلگه تک
ایشیق قارانلیقلا پنجلشه رک
یاشاتماق ایسته ییر جاهاندا بیزی
گونش سالاملاییر اراده میزی
یامانلیق، یاخشیلیق دورموش اوز -اوزه
دیلسیز عصریلردن میراث دیر بیزه
اسیر باهار یئلی قلبلریمیزه
لاکین آرخاسینجا کفن گئییر قیش
طبیعت وارلیغا بئله قارغامیش
بیر بایرام سؤزو وار، بیر ده کی ماتم
نشه بیر عالمدیر، غصه بیر عالم
حیات اؤز آتینی سورور دمادم
اودلار ایچینده ده هر بیر منظره
یئنه قاناد وئریر دوشونجه لره
یئنه ده اینسانین خیال شهپری
گزیر فضالاری، گؤی دنیزلری
سن ای سعادتین گؤزل سحری
آلقیشلا اینسانین پاک عملینی
اوزات یئر اوزونه هنر الینی
زاماندیر، بشرین ایمدادینا گل
خسته بیر گؤزلدیر هنرسیز عالم
هنر سؤیله دیگیم او قدرت لی ال
بوتون کایناتا قوی قاناد گرسین
بشر کاروانینا او یول گؤسترسین
فلاکت قوجالمیش، قارتدیر او کؤپک
اونون سوموکلری تئز چورویه جک
سعادت - گنجلیکدیر، آدی گله جک
اونون گؤزلرینده حیات عشقی وار
وار اولسون گله جک! وار اولسون باهار!
#صمد_وورغون
@SheirOcagi
