باشینا دؤندویوم تبریزین قاری
تبریزین قاری نا تقدیم اولونموش بیر طنز قوشما
باشینا دؤندویوم تبریزین قاری
نه اودون کار وئرر نه ده بخاری
قوی بیر تعریف دئییم من سنه باری
نه دئییم بو قارا دئمک اولار!؟
تبریزین قاری نینی شخصیتی وار
******
نعمتی بیله نه بو قار نعمت دیر
بو قار فلسفه دیر بو قار حکمت دیر
بو قاردا دونماق دا بیر مزیت دیر
باشقا شهرلره یاغماز بئله قار
تبریزین قارینین شخصیتی وار
******
بو قاردا ،شعرینی درین له درسن
سئوگینی دویغونو حزین له درسن
یانمیش اوره یینی سرینله درسن
ائله سرینلر کی دامارین یانار
تبریزین قاری نین شخصیتی وار
******
بو قاردا دوشمن لر بئلی بوکولوب
قارا‌بولود لاردان، دان لار سؤکولوب
بو قارا ستارخان قانی تؤکولوب
نه قدر دوز سپسن اَریمز،قالار
تبریزین قاری نین شخصیتی وار
****
دانیشسان، هاوادا دونار سؤزلرین
باشینا بؤرک قویسان یانار اوزلرین
اونودا باسدیرسان قالار گؤزلزرین
آدامین گؤزونون ایچی‌ده دونار
تبریزین قاری نین شخصیتی وار
******
اورانی باسدیرسان، بوران دوناجاق
بورانی باسدیرسان، اوران دوناجاق
من دئیه بیلمیرم هاران دوناجاق
هیکله دونرسن هر یئرین هامار
تبریزین قاذری نین شخصیتی وار
*******
یازیق تهرانلی لار، بیلمز نه دی قار
ایستی ده توستوده میللت چابالار
بیر سانتیم قاریاغسا هر یئر باغلانار
او قاردا، اورداکی تورکلری تاپار
تبریزین قاری نینی شخصیتی وار
*****
وتو چه دانی که"تبریز قاری" چیست!؟
چه دانی بو قاردا اوز یوخاری چیست!؟
کَتده گُرگ میخوره مال داواری چیست!؟
سو دونار، نفت دونا، ضدیخ دونار
تبریزین قاری نین شخصیتی وار
******
اردبیلین قاری شوخلوق گؤتورمز
زنجانین قاری دا توتسا اؤتورمز
آما تبریز قاری ائله چوخ سورمز
بیزیمکی آز یاغار چوخ شیرین یاغار
تبریزین قاری نین شخصیتی وار
*****
تبریزین قاری دیر اوجادان گلر
آدامین سومویون ایلییین دلر
قاداسین آلدیغیم اؤزوده بیلر
بیر گون اریه جک گلجک باهار
تبریزین قاری نینی شخصیتی وار
صالح سجادی
@dalqhalar